Blog Pat Fleury – Éire Óg an Aonaigh v Luachma-Caisleán Laighnigh #GAA #TG4 #GAABEO

Craobh na gClub – Cluiche Ceannais Peile Mhuineacháin – Éire Óg an Aonaigh v Luachma-Caisleán Laighnigh – 13/10/2013

Pat Fleury

TEACHT ANIAR IONTACH AG LUACHMA-CAISLEÁN LAIGHNIGH.

Uaireanta, tagann laoch ar an bhfód in am an ghátair agus tharla sé sin i Staid Semple inné nuair a rinne Noel McGrath éacht thar cuimse sa dara leath de chluiche ceannais Thiobraid Árann i gcoinne Éire Óg an Aonaigh. Chuir Luachma C.L. aon cheann déag de sheansanna amú sa chéad leath agus bhí gach cuma ar an scéal go mbeadh an bua ag Éire Óg. An scór ag leathama 1-7 in aghaidh 0-6. Díreach ó thus an dara leath sin, bhí sé soiléir go raibh imreoir speisialta ar an bpáirc agus bhí sé de phribhléid dúinn máistir a fheiceáil i mbun a cheird.
D’aimsigh sé seacht gcúilín in iomlán, sé cinn sa dara leath agus laghdaigh siad an bearna eatarthu agus nuair a fuair Liam McGrath cúl chun iad a chur chun tosaigh don chéad uair, choimead siad greim ar chúrsaí go dtí an deireadh, cé go raibh seansanna ag Éire Óg freisin sa tréimhse sin. Chaill siad a gcaptaen agus leathchúlaí lár, Eddie Connolly, nuair a thit sé tinn tar-éis an cluiche leathcheannais agus guímis gach rath air agus is léir go ndearna na himreoirí go léir iarracht níos mó ná riamh chun an craobh a bhuachaint dó agus d’éirigh leo. Beidh siad ag imirt i gcluiche leathcheannais an chontae sa pheil le gairid agus da bharr sin, beidh siad ana-ghnóthach ach is cuma leo. Tréaslaimid leo as a ngaisce inné. An scór ag an deireadh: Luachma-Caisleán Laighnigh 1-17 Éire Óg an Aonaigh 1-16.

Read Full Post »

Blog Cathal Moore – Biorra v Cill Chormaic-Cill Achaidh #GAA #TG4 #GAABEO

Craobh na gClub – Cluiche Ceannais Iomána Uíbh Fhailí – Biorra v Cill Chormaic-Cill Achaidh – 6/10/2013

Cluiche taitneamhach go leor cé nach raibh caighdeán na himeartha thar moladh beirte.  D’fheabhsaigh an imirt sa dara leath.  Bhí  CC / CA beagán chun tosaigh ó thús an chluiche.  Beidh áiféala ar Bhiorra nuair a fhéachann siad siar ar an gcluiche seo.  Chuireadar an iomarca seansanna amú ceithre cinn déag san iomlán.  Chomh maith leis sin ghéill siad uathu an iomarca pocanna saor go leor acu an-bhog.  D’aimsigh Ciaran Slevin naoí gcinn i rith an chluiche.  Scóráil cúigear tosaí ón imirt do Chill Chormaic agus b’shin an difríocht idir na foirne sa deireadh.  Nach aisteach an rud é go raibh foireann níos láidre ag Biorra sa dara leath go háirithe nuair a tháinig Simon Whelehan isteach mar ionadaí.  Throid Dylan Hayden agus Paddy Mullins go fíochmhar dóibh agus d’aimsigh siad ceithre chúilín an duine ón imirt.

An dara craobh as a chéile agus Biorra buailte arís.  Éacht déanta ag Cill Chormaic gan amhras.  Daniel Currams a scóráil an cúl cinniúnach inniú.  D’imir Ciaran Slevin, Ger agus Peter Healion agus Conor Mahon an-mhaith freisin ach an fhadhb is mó a bhí acu anuraidh ná easpa scóranna ón imirt sna tosaithe.  Sé chúilín san iomlán a d’aimsigh siad ón imirt. Tá gá le feabhas fós má tá sé ar intinn acu dul chomh fada le Páirc an Chrócaigh arís.

Cathal de Mórdha, blog GAA Beo

Read Full Post »

Blog Pat Fleury – Aontroim v Loch Garman & An Clár v Gaillimh #GAA #TG4 #GAABEO #BGEU21

Pat Fleury

 

Cill Dara v Ciarraí

Níor imir Ciarraí cluiche craoibhe le trí mhí déag anuas mar nach bhfuil contae eile I gCúige Mumhan i Roinn B agus ní bhfuaair siad aon Chluiche leathcheannais. In ainneoin sin, níor chuir sé isteach ná amach orthu mar d’éirigh leo an cluiche ceannais a bhuachaint in aghaidh Cill Dara, curaithe Laighin agus cluiche leathcheannais imirthe acu. Cé go raibh Cill Dara chun tosaigh an chuid is mó den am mar gur aimsigh said trí chúl sa chéad leath, bhí Ciarraí ag imirt go maith agus d’aimsigh said 0-11 ón imirt sa chéad leath sin, 0-14 in iomlán in aghaidh 3-5 do Chill Dara. Bhí Niall Kenny ar fheabhas sa chéad leath: bhí 2-2 aimsithe aige ag leatham. Lean Ciarraí leis an iarracht sa dara leath ach bhi gach cuma ar an scéal nach raibh seans acu nuair a scóráil Ryan Casey cúl eile sa dara leath agus bhí an t-am beagnach thart, agus dhá nóiméad breise imithe nuair a scóráil Padraig Boyle an cúl cinniúnach do Chiarraí agus ní raibh am a ndóthain ag Cill Dara teacht ar-ais. Bhí an toradh crua ar Chill Dara atá mí-amharach sa chraobh seo ach tréaslaimid le buachaillí Chiarraí. 1-21 in aghaidh 4-10 ag an deireadh.

An Clár v Aontroim

Tá sé deacair a chreidiúnt nach raibh fiú is craobh na Mumhan faoi 21 buaite ag An gClár roimh 2009, ach d’athraigh gach rud idir an dá linn. Bhuaigh said Craobh na hÉireann don tríú huair aréir i nDurlas in aghaidh Aontroim, a bhuail Loch Garman sa chluiche leathcheannais. Ní raibh éinne ag súil leis an mbua agus bhí sr tuilte go maith acu ar an lá sin ach bhí se soiléir ó thus na himeartha aréir go raibh caighdeán eile ar fad gceist ag An gClár.

Faraoir, ní fhacamar coimhlint ar chor ar bith. Ní raibh aon locht ar Aontroim; bhí bearna ollmhór eatarthu agus bhí sé thart mar chluiche bhfad roimh leatham. Thug buachaillí An Chláir taispeantas den chéad scoth agus bhí an scór ag leatham 2-16 in aghaidh 0-4. Bhí Colm Galvin agus Tony Kelly ina ríthe i lár páirce agus bhí Cathal O Connell marfach ó bhuillí saoire. Bhí An Clár ábalta an ceathrar ar an bhfoireann sinsir a bhaint den bpáirc go luath sa dara leath agus bhí rudaí beagáinín níos cothroime ina dhiaidh ach ní raibh ach toradh amhain i ndán dúinn.Bhí Davy O Halloran go hiontach an oíche ar fad. Chríochnaigh sé le 1-4 agus an gradam laoch na himeartha ach bhí said go léir ar fheabhas. Tá muintir An Chláir ag baint taitneamh as ré órga faoi láthair agus iad ag súil leis an athimirt in aghaidh Corcaigh sa Chraobh sinsir. Ar aghaidh leo !!!

Pat Fleury, blog GAA Beo

Read Full Post »

Blog Cathal Moore – Aontroim v Loch Garman & An Clár v Gaillimh #GAA #TG4 #GAABEO #BGEU21

Craobh Iomána BGE Fé 21 – Cluiche Leathcheannais na hÉireann – Aontroim v Loch Garman – 24/8/2013

Cathal Moore

Aontroim cáillithe don chluiche ceannais…..Cé a chreidfeadh é agus bua tuillte go maith acu.  Is féidir a rá go raibh an t-ádh leo leis an chéad chúl a d’aimsigh siad ach as sin amach iadsan a bhí in uachtar ar fud na páirce.  D’oibrigh an plean imeartha a bhí acu a d’fhág beirt sa line lán tosaigh agus rinne Shane Dooey obair na gcapaill dóibh ag cabhrú lár páirce.  D’oibrigh siad an-chrua ar fud na páirce agus níor thugadar spas ná am do na Carmanaigh.  D’imir na leaids sa lár ar fheabhas.  Bhí an lán cúlaí Matthew Donnelly ina rí ar imeall na cearnóige agus thug an captaen Jackson McGreevey an-cheannaireacht lár páirce. Ach é sin ráite is iad scóranna a bhuann cluiche agus bhí laochra acu i measc na dtosaithe, Niall McKenna (0-2), Ciarán Clarke (1-5, 0-5PS) agus laoch na himeartha Stephan McAfee (1-4).

Beidh imreoirí Loch Garman díomach ach níor imir siad sách maith inniú.  Rinne Conor McDonald agus Barry Carton an iarracht ach ní fhaca siad seilbh na liathróide minic go leor sa line lán tosaigh.  Bhí sé ródhéanach nuair a rinneadh na hathruithe.  Níor dhúisigh siad in am agus cé nach raibh ach farasbarr de dhá chúilín eatarthu sa deireadh bhí an cluiche thart deich nóiméad roimhe sin i ndáiríre.  Lá stairúil d’Aontroim ach an féidir leo céim níos faide a thógáil?

 

Craobh Iomána BGE Fé 21 – Cluiche Leathcheannais na hÉireann – An Clár v Gaillimh – 24/8/2013

Bua chuimsitheach go maith ag an gClár sa deireadh ach bhí an cluiche idir dhá cheann na meá ag leath ama.  Bhí caighdeán na himeartha sa chéad leath uafásach ar fad.  Níor aimsíodh ach sé scór ón imirt ar fad agus bhí lár na páirce plódaithe rómhinic.  Ag am a cinnt bhí naonúr as chaon taobh idir na línte 65 ag iarraidh teacht  ar an liathróid.  B’iad Gaillimh a bhí níos sásta ag leath ama cé go raibh an Clár dhá chúilín chun tosaigh.

D’imir an Clár i bhfad níos fearr sa dara leath.  Ar chúis éigin bhí níos mó spáis ann lár páirce agus scóráil na tosaithe ar fad ón imirt.  Bhí Davy O’Halloran agus Peter Duggan an-fheicéalach ar fad ach b’é Cathal O’Connell a bhí lárnach san imirt i gcónaí agus d’aimsigh sé 1-06 (5PS) a léiríonn easpa smachta i measc cosantóirí na Gaillimhe.  Bhí an bua chomh heasca ná go raibh Tony Kelly, Colm Galvin agus Padraic Collins bainte agus deich nóiméad fágtha.  Laoch na imeartha bronnta arís ar David McInerney a bhí dochloíte ar imeall na cearnóige.  D’imir Stephen O’Halloran an-chluiche freisin.

Ní raibh Conor Cooney ná Jonathan Glynn san imirt minic go leor agus níor scóráil Gaillimh ach 0-7 sa chluiche ar fad.  Ní leor é sin.  An mbeidh an Clár ábalta dhá Chraobh F-21 a chur le chéile?  Bígí ann i nDurlas i Meán Fómhair!

Cathal de Mórdha, blog GAA Beo

Read Full Post »

Blog Pat Fleury – Aontroim v Loch Garman & An Clár v Gaillimh #GAA #TG4 #GAABEO #BGEU21

Craobh Iomána BGE Fé 21 – Cluiche Leathcheannais na hÉireann – Aontroim v Loch Garman – 24/8/2013

Pat Fleury

Comhgairdeas do Aontroim agus gach rath sa chluiche ceannais!! Rinne siad éacht iontach i nDurlas Éile ar an Sathairn nach raibh éinne ag súil leis, mé féin san áireamh. Cé go bhfuair Loch Garman an chéad scór, fuair Stephan McAfee cúl, tar-éis botún tubaisteach ó Brian Murphy nuair a sciorr an sliotar fliuch as a lámh, agus bhí Aontroim chun tosaigh as sin go deireadh an chluiche. Rinne Loch Garman gach iarracht chun teacht ar-ais ach nuair a scóráil Ciaran Clarke an dara cúl do Aontroim, bhí sé soiléir go raibh Loch Garman i gcruachás. Bhí tús maith ag teastáil ó Loch Garman sa dara leath ach fuair Aontroim an chéad scór agus chuaigh siad ó neart go neart agus bhí na cosainteoirí ar fheabhas sa dara leath sin nuair a bhí Loch Garman ag déanamh tréaniarracht chun an cluiche a shábháil. Is mór an trua nach raibh níos mó daoine as Aontroim ann chun an lá speisialta a cheiliúradh ach bhain an grúpa beag a bhí ann an-taitneamh as an ócáid stairiúil. An scór ag an deireadh ná 2-15 in aghaidh 1-16.

Craobh Iomána BGE Fé 21 – Cluiche Leathcheannais na hÉireann – An Clár v Gaillimh – 24/8/2013
Níor éirigh ga maith le míonúirí na Gaillimhe trí bliana ó shin agus bhí a fhios acu go raibh plean ag teastáil chun stop a chur le buachaillí an Chláir, atá ag imirt ar fheabhas i mbliana. D’éirigh go maith leis an bplean sa chéad leath. Choimeád siad gach rud teann agus níor thug siad spás ar bith do Tony Kelly, Podge Collins agus a leithéid chun na ruathair a dhéanamh. An scór ag leathama ná An Clár 0-5  Gaillimh 0-3. B’fhéidir nach raibh an fuinneamh céanna ag imreoirí na Gaillimhe sa dara leath chun iarracht ollmhór a dhéanamh arís ach thosaigh na spásanna ag oscailt i ndiaidh leathama agus nuair a fuair Cathal O’Connell cúl tar-éis ceithre nóiméid, thosaigh An Clár ag rith tríothu agus ní raibh ach toradh amháin i ndán dúinn. Chaill siad Aaron Cunningham roimh leathama agus is cosúil nach mbeidh sé ar-ais in am don gcluiche ceannais ar an 14ú Meán Fómhair. Bhí David McInerney ina rí arís mar lánchúlaí agus d’imir gach duine acu go maith, go háirithe sa dara leath. Beidh díomá ar lucht leanta na Gaillimhe leis an dtoradh ach tá a fhios acu gur grúpa speisialta iad buachaillí an Chláir agus beidh sé deacair iad a stopadh sa chluiche ceannais.

Pat Fleury, blog GAA Beo

Read Full Post »

Blog Pat Fleury – Port Láirge v An Clár #GAA #TG4 #GAABEO #BGEU21

Craobh Iomána BGE Fé 21 – Cluiche Leathcheannais na Mumhan – Port Láirge v An Clár  – 18/7/2013

Pat Fleury

Tá sé deacair go leor cluiche ar bith a bhuachaint le foireann iomlán ach, nuair a chailleann tú imreoir, mar a tharla do Phort Láirge aréir nuair a fuair Paudie Prendergast an dara carta buí, rinne an cosainteoir breise an difríocht eatarthu. Taispeánadh é seo nuair a fuair Séadna Morey, leathchúlaí, an spás chun dul suas an páirc agus cúl cinniúnach a scóráil. Fuair Aaron Cunningham ceann eile tar-éis tamaill chun an cluiche a chríochnú ach thug cúl Morey an creideamh dóibh chun dul ar aghaidh. Bhí plean ag Port Láirge chun rudaí a choimeád teann agus d’oibrigh sé don chuid is mó. Bhí tosaí cúinne, Colin Dunford, ag cabhrú leis na leathchúlaithe agus bhí Darragh Fives ag clúdú taobh thiar dóibh. Bhí siad cuilín chun tosaigh ag leathama agus rinne siad go léir iarracht ollmhór sa dara leath ach d’oscail na spásanna suas do na Cláirínigh tar-éis do Prendergast an páirc a fhágáil agus bhí an taithí acu chun an jab a chríochnú. Fuair Tony Kelly buille den sliotar sa chéad leath agus bhí air éirí as ar an oíche. Tá súil ag gach éinne nach bhfuil an gortú ró-dháiríre. Beidh coimhlint maith idir An Clár agus Tiobraid Árann sa chluiche ceannais ar an seachtú Lúnasa.
Pat Fleury, blog GAA Beo

Read Full Post »

Blog Cathal Moore – Tiobraid Árann v Corcaigh #GAA #TG4 #GAABEO #BGEU21

Craobh Iomána BGE Fé 21 – Cluiche Leathcheannais na Mumhan – Tiobraid Árann v Corcaigh  – 17/7/2013

Cathal Moore

Tar éis 25 nóiméad bhí Tiobraid Árann deich gcúilín chun cinn agus an cuma ar an scéal go raibh an cluiche thart. Rinne Corcaigh an-teacht aniar roimh leath ama a d’fhág ceithre chúilín idir na foirne ag leath ama.  Bhíomar ar fad ag súil le dian choimhlint sa dara leath ach ní mar sin a tharla.

Bua an-easca ag na Tiobradaigh anocht i Stáid Semple sa deireadh.  I ngach cluiche bíonn an lámh in uachtar ag foireann ag am faoi leith ach caithfear scóranna a chur ar chlár na scór sa tréimse sin.  B’shin an difríocht idir na foirne anocht.  I rith an tréimhse sin roimh leath ama scóráil Corcaigh 0-6 ach sa dara leath nuair a bhí Tiobraid Árann in uachtar d’aimsigh siad 2-06.  Scóráil naonúr ón imirt do Thiobraid Árann.  Ar an lámh eile níor scóráil ach beirt ón imirt do Chorcaigh as na tosaithe a thosaigh an cluiche agus ní leor é sin.

D’imir an líne leath cúl de Joe O Dwyer, Tomás Hamill agus Seamus Kennedy ar fheabas i measc na gcosantóirí do Thiobraid Árann.  Thug Niall O’Meara  an –taispeántas i rith an chluiche agus chríochnaigh sé le 4 chúilín ón imirt.  Bhí Brian Stapleton an-fheicéalach lár páirce agus d’aimsigh Jason Forde 2-07 agus Bill Walsh 2-01 dóibh freisin.

Bhí Tiobraid Árann níos fearr agus níos láidre anocht do Chorcaigh.  Is féidir le Conor Lehane imirt níos fearr.  Sa chéad leath rinne Brian Murray agus Rob O Shea an-iarracht lár páirce agus rinne Mark Sugrue difríocht nuair a tháining sé isteach mar thosaí.  B’e Jamie Coughlan an imreoir is éifeachtaí a bhí ag Corcaigh anocht.

Tá obair le déanamh ag Tiobraid Árann roimh an cluiche ceannais.  Ba cheart go mbeadh an cluiche seo thart ag leath ama.  Is féidir leo dul céim níos faide i mbliana ar an 8ú Lúnasa agus craobh na Mumhan a bhuacaint ón méid a chonaic mé anocht.

Cathal de Mórdha, blog GAA Beo

Read Full Post »

Blog Pat Fleury – Loch Garman v Cill Chainnigh #GAA #TG4 #GAABEO #BGEU21

Craobh Iomána BGE Fé 21 – Cluiche Ceannais Laighean – Loch Garman v Cill Chainnigh – 10/7/2013

Pat Fleury

BUA AG LOCH GARMAN LE CRÍOCH DRAMATÚIL.
Fuair Loch Garman an ceann is fearr ar Chill Chainnigh le cúl sa nóiméad deireanach den am breise i gcluiche ceannais Laighean faoi 21 aréir i bPáirc Loch Garman. Cúl tubaisteach, míámharach ó thaobh cúlbáire Chill Chainnigh, Aaron Duggan, a d’imir go maith i rith an chluiche go léir go dtí sin. Bhí na fóirne ar chomhscór, bhí brú ar gach éinne agus bhí cosainteoirí Chill Chainnigh ro-dhíograiseach chun an dainséar a ghlanadh ach chríochnaigh an sliotar sa líontán…….chuaigh lucht leanta Loch Garman ar mire le lúcháir agus shéid an réiteoir a fheadóg go gairid ina dhiaidh sin. An scór deireanach 1.21 in aghaidh 0-21……an chéad craobh buaite ag Loch Garman ó 2002.
Is cosúil nach raibh bainistíocht Chill Chainnigh ró-shásta le cúrsaí tar-éis an cluiche leathcheannais in aghaidh Uíbh Fhailí. Rinne siad a lán athraithe agus ní raibh líne ar an bhfoireann nár athraigh siad.
Thosaigh Loch Garman go maith ach bhí na Cait chun cinn ag leathama 0-12 go  0-9. Bhí roinnt deiseanna ag Cill Chainnigh sa chéad leath sin chun cúil a scóráil ach rinne cosainteoirí Loch Garman go h-an mhaith chun iad a stopadh. Bhí an dara leath an-teann agus ní raibh mórán eatarthu ag am ar bith. Fuair Jack Guiney cúilín ó bhuille saor ag an deireadh agus bhí am breise i ndán dúinn. Ní raibh éinne ag gearán, áfach, mar bhí an coimhlint ar fheabhas. Nuair a chuaigh Loch Garman dhá chúilín chun cinn san am breise, bhí cuma dóchasach ar mhuintir an chontae sin ach tháinig na Cait ar-ais arís agus chuaigh siad cúilín chun cinn. Ansin tháinig an drama…scóráil Guiney poc saor deacair ón taobhlíne agus ansin tháinig an cúl cinniúnach sin.
Tráthnóna álainn, slua mór agus cluiche corraitheach…. cad eile a bheadh ag teastáil ó éinne ????

Pat Fleury, blog GAA Beo

Read Full Post »

Blog Pat Fleury – Uíbh Fhailí v Cill Chainnigh #GAA #TG4 #GAABEO #BGEU21

Craobh Iomána BGE Fé 21 – Cluiche Leathcheannais Laighean – Uíbh Fhailí v Cill Chainnigh – 26/6/2013

Pat Fleury

Nuair a bhíonn foireann éigin ag brath don iomarca ar imreoir amháin chun scóranna a fháil, titeann an lug ar an lag orthu de ghnáth nuair a bhuaileann siad le na fóirne móra. Sin a tharla do Uíbh Fhailí aréir i dTulach Mhór.
Fuair Stephen Quirke 1-10 as 1-13 do na fir lártíre. D’aimsigh an naoscaire eile ar an bpáirc, John Power, 0-10 do na Cait ach fuair imreoirí eile 1-9 eatarthu, in aghaidh 0-3 ag imreoirí Uíbh Fhailí. Thaispeáin an cluiche an tábhacht a bhaineann le neart an bhinse. Rinne gach fear ionad a tháinig ar an bpáirc difríocht, go háirithe Michael Brennan, a fuair 1-1 agus an cúl is cinniúnaí ar fad ar an oíche. D’imir Uíbh Fhailí go han mhaith agus bhí siad chun tosaigh ag leathama, 0-9 go 0-8.
Lean siad leis an iarracht sa dara leath agus ní raibh ach cúilín eatarthu le deich nóiméid fágtha. Fuair Uibh Fhailí poc éiricthe ag an am sin ach bhuail Stephen Quirke é i dtreo an cúlbáire agus chaill said an deis. Scóráil Michael Brennan an cúl fíor-thábhachtach agus chríochnaigh na Cait go láidir agus bhí sé chúilín eatarthu ag an deireadh. Bua crua ag Cill Chainnigh a chabhróidh go mór leo sa chluiche ceannais i gcoinne Loch Garman ar an 10 Iúil.

Pat Fleury, blog GAA Beo

Read Full Post »

Blog Cathal Moore – Uíbh Fhailí v Cill Chainnigh #GAA #TG4 #GAABEO #BGEU21

Craobh Iomána BGE Fé 21 – Cluiche Leathcheannais Laighean – Uíbh Fhailí v Cill Chainnigh – 26/6/2013

Cathal Moore

Cluiche a chaill Uíbh Fhailí in áit bua iontach ag na Cait. 15 nóiméad le dul agus bhí Uíbh Fhailí chun cinn 1-12 go 0-12.  As sin go dtí deireadh an cluiche scóráil na Cait 1-7 agus gan ach cúilín aonair ó Uíbh Fhailí mar fhreagra. Ceard a tharla? Rinne Cill Chainnigh trí athrú. Thug siad Jack Langton isteach lár páirce agus beirt sna tosaithe Michael Brennan (1-01) agus Conor Martin sa dara leath. Ach chas an cluiche seo nuair a chaill Stephen Quirke poc pionós. Is mór an trua mar go dtí sin bhí tine ar chraiceann Quirke a d’aimsigh 1-10 sa chluiche. Beidh Richie Mulrooney sásta leis an mbua ach tá a fhios aige go gcaithfidh siad feabhsú don chluiche in aghaidh Loch Garman sa chluiche ceannais Laighean i gceann coicíse. Aisteach go leor bhí níos mó seilbh ag na Cait sa chluiche ach ní raibh siad in ann é a chur ar chlár na scór.

D’imir Willie Phelan agus Brian Kennedy ar fheabhas i measc na gcosantóirí. Thug Kevin Kelly an–taispeántas i rith an chluiche agus chríochnaigh sé le 4 chúilín ón imirt. Bhí Cillian Buckley an-fheicéalach lár páirce agus d’aimsigh John Power 0-10 dóibh freisin.

Beidh áiféala ar Ger Coughlan agus a fhoireann mar d’fhéadfadh an cluiche seo a bheith buaite acu. Ghéill siad an iomarca pocanna saora uathu agus d’éirigh siad tuirseach sa deich nóiméad deireanach. Níor scóráil ach triúr ón imirt dóibh agus ní leor é sin. Easpa féinmhuinín a chur isteach orthu sa deireadh.

Bhí na coinníollacha thar cionn tráthnóna i bPáirc Uí Chonchúir.  Cluiche an-thaitneamhach ó thus deireadh. Leanann na Cait ar aghaidh agus iad ag dul ó neart go neart. An féidir iad a stopadh?

Cathal de Mórdha, blog GAA Beo

Read Full Post »